Del

Imminut assortuupput peqqinnissaqarfik naammagittaalliutigineqartuarmat uffa aningaasartorfiginerpaallutigu. Iluaniik ilisimasaqartutut siunnersuutissaqarpunga pisariillisaariillisaasoqarnissaanut peqataanillu pitsanngorsaasoqarnissaanut.

Peqqinnissaqarfik innuttaasunit naammagittaalliutigineqartuarpoq akileraarutit qaffasinnerat pissutigalugu soorunami isumalluutigineqarnera qaffasimmat. Imminut assortuuttorpassuarnik peqarpoq uangalu innuttaasut peqqissusaannut ilisimasakka naapertorlugit oqaatigissavara suliassarpassuaqaratta.

Piffissami aggersumi peqqinnissaqarfimmi angisuumik suliassanngortussaavoq inuiaqatigiit ineriartornerannut naliginnaasumik tulluussarnissaq sualummik maannakkutut ingerlaannartoqassappat. Utoqqaat amerliartorput aamma inuunertusiartorput. Inuulluataarnerup kinguneranik nappaatit amerliartortussaapput peqqinnissaqarfiup nukinnik amerlanerusunik pisariaqartitsilerneranik kinguneqartussat. Aamma pissutaalluni nunarsuup sinnerani nakorsaatit akitsoriartornerat. Peqataanik avammut ammariartornitta nassataanik innuttaasut isumalluarput nunarsuup sinnerani inuiaqatigiinnut allanut neqeroorutigineqartartut assiginik kiffartuunneqartassallutik.

Takoreerparput innuttaasut nunanut allanut nutsertut misigisimallutik eqqortumik katsorsarneqarneq ajorlutik taamaasillutillu ernumasunik inuunertik annaasinnaallugu. Tamanna iliuuseqarfigisariaqarparput inooqatigiinni ajutuuinnissamut ikiuutissat atorsinnaasut pigiinnassagutsigit.

Taamaattumik Peqqinnissaqarfimmi suliassanut eqqarsaatigilluakkanik piviusorsiortunillu iliuusissanik eqqarsartariaqarpugut. Nakorsat peqqissaasullu nunaqavissut amingaataaqaat. Inuusuttagut pilerisaartariaqarpagut ilinnialissatillutik peqqinnissaqarfik eqqarsaatigisaqqullugu aningaasaliissutigineqartartut annissornagit nunami namminermi atorneqarsinnaaqqullugit. Peqataanik pisariaqartinneqarpoq peqqinnissaqarfik ullutsinnut naapertuuttoq atuisunullu iluarinarnerusoq.

Ilaatigut makkunannga siunnersuutissaqarpunga:

– Suleriaatsit pioreersut aaqqissuuteqqinneqassasut tapersersorneqarlutik aqutsisunit nukittuunit, siumut isigalutik pilersaarusiorsinnaasunit aamma siumut takorluuisinnaasunit qularnaarlugu suleriaaseq pisariaqartinneqartoq.

– Imminut kiffartuunnissamut periarfissanik eqqussisariaqarpugut kaptinnissamut inniminniisoqassatillugu, iisartakkanut allagartat nutarterneqassatillugit, tulleriiaarinissamut aalajangersakkat naapertorlugit nakorsamut piffissamik inniminniisoqassatillugu qarasaasiami immersorneqartartussanik

– Internetip atorluarneqarsinnaanera qaammarsaatigineqartariaqarpoq  atuisumik ilisimasanik avitseqateqarnissaq atuisullu peqataatinneqarnissaa pillugit tamatuma atuisut iluarisimaarinninnerat annertusassavaa allaat isorliunerusuni imaaliallaannaq nakorsamit misissorneqarnissamut periarfissaqarfiunngingajattuni.

– Toqujartortut immikkoortortaqarfiini inissanik pilersitsisoqartariaqarpoq toqujartortut ilaqutaasullu toqqissisimaqqullugit.

– Peruluttut aalajangersimasumik ataqatigiissaarisoqassapput aalajangersimasumillu attaveqaataasumik nakorsaqarlutik, immitsinnut avinngarusimanitta  sulisussaqarnikkullu pissutsit kingunerisarmassuk amerlaqisut  soorlu Danmarkiliartinneqartarnerat. Pissutsini taamaattuni minnerpaaffimmiitinneqassaaq napparsimasup ilaqutaasullu piffissami artornartumi misigisimanissaat “ikiorneqarlutik” puigorneqaratik.

– Atuisut aalajangersimasumik nakorsaqarnissaminnut pisinnaatitaaffeqartariaqarput – nakorsamummi aalajangersimasumut attaveqarneq atuisumut toqqissisimalersitsisarpoq peqqinnissaqarfiullu pisariaqanngitsumik unitsitsisarnerit sipaarfigissavai.

Qulaani taaneqartut pisariillisaanrit pitsanngorsaanerillu pissutaallutik nukiit pioreersut qajassuarnerusumik sipaarfigineqarsinnaapput.

Aningaasaqarneq pillugu siunnersuisoqatigiit 2016-mi uppernarsarpaat peqqinnissaqarfik aningaasaqarnikkut sulisoqarnikkullu ajornartorsiortoq. Taamaattumik pingaartorujussuuvoq politikerit uangut oqallisigissagipput pitsaanerpaamik qanoq iluarsiissuteqassanerluta ullumimut naleqqiullugu peqqinnissaqarfik pitsaanerungaartoq pilersikkumallugu.

Inussiarnersumik inuulluaqqusillunga

Anna Wangenheim
Peqqissaasoq aamma Demokraatit sinnerlugit qinigassanngortittoq

Kontakt Os / Attavigisigut

Vi er ikke tilgængelig lige nu. Men du kan sende os en e-mail, og så vender vi tilbage til dig hurtigst muligt. Massakkut pissarsiarisinnaanngikkutsigut e-mailerpigisinnaavatsigut, uterfigissavatsigit piaarnerpaamik.

Atuarneqarsinnaanngila? Teksti allanngoruk. captcha txt