Del

Asasara Mimi Karlsen (IA), Kalaallit Nunaanni nakorsat peqatigiiffiat GIF-lu

Sermitsiaq.ag-mi 19/4-18 ilanngutassiaq atuarpara, isumaginnittoqarfimmut napparsimasunik, soorlu aanaartoorsimasut taqqakkut milittoorsimasut assigisaasalu, sungiusaanerinut akisussaanerup tunniunneqarnissaa siunnersuutiginiarneqartoq. Isumaqanngilanga, peqqinnissaqarfiup isumagissagaa kommunip suliassaa. Taarsiullugu siunnersuutigissavara, kommunini isumaginnittut akornanni taakkununnga ukkatalinnut pikkorissaanerit atorlugit piginnaanngorsaanerit nakunneqartariaqarneri, taamaaliornikkut innuttaasut najukkaminni sullissivinnilu sungiusarneqarnerisa ingerlannerat pitsaanerusumik qulakkeerneqassammat. Sillimmatigut pioreersut atorluarnerusariaqarpagut annertunerujussuarmik. Imminut salloqittarneruvoq isumaqaraanni, peqqinnissaqarfimmi timimik sungiusaasunik atorfinitsitsisoqarsinnaasoq, uffalu kommunimi taakku atorfinitsissinnaasimanagilluunniit. Isumaqarpunga tamanna ajornannginaagaavallaartoq. Soormi kommunimi akissaatit tigummiinnaraanni, tassanilu atorfiit inuttassarsineri misilittarlugit? Sooruna atorfinitsitsineq ajornartoq? Peqqinnissaqarfik assigiinngitsorpassuarnik suliassaqareerpoq, taamaattumillu innuttaasunut sungiusagassanut iluaqutaanngilaq, uninngasuulluni uninnganermullu atasumik saniatigut navianartorsiortinneqarluni.

Piviusorpaluttumik siunnersuutitut isigineqarsinnaavoq, suffeqanngitsut paaqqinninnerup isumaginninnerullu iluani sulilernissaminnut toqqaanissaannik kajumissaarnissaat pitsaanerussannginnersoq. Akissaqartinngilagut inuit angerlarsimaffimmiitillugit ikiuutisiaqartillugillu saniatigullu napparsimasuutitta innuttattalu amigartumik katsorsarnerannut uppernarsaasuulluta. Qasuersaarfiit assigisaalu siunertaminnut atorneqanngillat, assassaqannginnatta – peqqinnissaqarfimmut akisussaaffik miloriunnagu suliamik naammasserusunneq pigiuk.

Akisussaaffeqarfiit sorliit kommunip peqqinnissaqarfiulluunnit ataaniinnersut erseqqissarluarneqarsimanngillat, tamassumalu kinguneraa innuttaasut/katsorsagassat aaqqissuussinerup iluani kiap isumagisassarinerai paatsiveerusimaarutaallualersimallutik – tamannalu unitsittariaqarparput. Kikkunnulluunniit tamanna ataqqinassuseqanngilaq. Taamaattumik atugassaqarfiit erseqqinnerujussuarmik nassuiartariaqarpagut, innuttaasut/katsorsagassat toqqissisimanissaat qulakkeerniarlugu, ingammillu sulisunut toqqaannartumik atassuteqartunut pineqartunut.

Qinigaaffimmi kingullermi qaangiutilersumi IA-p peqqinnissaqarfik akisussaasuuffigisimavaa, uannullu ersarippoq, inuiaqatigiit siunertaanni sivisuallaamik isumalluutit sillimaffigineqarsimannginneri. Tassarpiaavoq sulisussanik amigaateqarnerput!

Taamaattumik atorfissaqartipparput, periusissaq ersarissoq, qanoq iliorutta siunissami peqqinnissaqarfik, isumaginnittoqarfik paaqqinnittoqarfillu, piginnaasaqarfinnik pisariaqartunik ilalik qulakkersinnaassallugu – ilungersunartoqarnerulernera kiisalu unamminartut pioreersut naammassinissaanut pisinnaasanik amingaateqarneq pillugu nakorsat peqatigiiffiata allagaa aamma tamatumani eqqarsaatigineqartariaqarpoq.

Ukiuni amerlavallaani pikkoriffigisimavarput ajornartorsiutinik matusineq, tamanut tamaanga aningaasaliissutinik annertusineq, pissutigalugu peqqinnissaqarfiup kiffartuussinerata annertusisamik atornissaanut pisariaqartitsineq. Tassaniilerporlu timersorneq timillu atornerata ilaatilernerata ilanngunnera!

GIF Sermitsiaq.ag-mut 17/4 18 allappoq, timersornermut atatillugu naalakkersuinikkut anguniakkanik maqaasillutik. Naalakkersuinerup tungaaniit timersorneq siuarsassavarput, timersornermik sammisallit amerlanerit, pikkorissullu pilersissavagut, pikkorivissut timersuutaannik sammisaqartut Kalaallit Nunaata siunissaani pilerisaarisooqataaniassammata. Tamanna kajumissitsineruvoq pitsaasoq! Pikkorivissut timersuutaat kisimi pineqanngilaq. Timersorneq ullup ingerlaneranut ilaatinneqartariaqarpoq.  Kinaluunniit periarfissaqartariaqarpoq, sunngiffimmini peqqinnartunik sammisaqarnissaminut, taamaakkaluartorli, akisussaassuseq kimilluunniit aalajangertariaqarpoq, minnerunngitsumik sulititsisunit, taakkumi arajutsisimanngilaat sulinerup nalaani timersornerup sunniutaasa ajunngitsuuneri. KRAM periuseq atorlugu sammisaqassaagut (Nerisassat, Pujortarneq, Imigassaq, Timersorneq) inuiaqatigiit sillimmatai annertusarniarlugit, aningaasaqarnikkut inuttullu, ileqqupalaat ajugaaffigissagutsigit. Ullumikkumiit annertunerujussuarmik pitsaaliuinermik eqqarsarneq aallartittariaqarparput.

Taqqakkut milittoornerit, kræfti allallu nappaatit inooriaatsimut atassuteqartut pinaveersaartittariaqarpagut, nerisasassat timersornerlu pillugit misigisimanerup siusissukkut inissinneratigut. Tamanna meeqqerivinni aallarnertariaqarpoq, meeqqat peqqinnartunik ajunngitsunillu sungiussinissaannik ilinniatinniarlugit.

Ajunnginneruliinnarsinnaavoq. Saniatigut iluanaarutitut misigissavarput peqqinnissaqarfimmik minnerusumik nukingisaarineq, taakkumi nukissaqarfigilissammassuk ineriartortitsinermik suliniuteqarneq, taamaalillutillu kingorna innuttaasut naammassiuminaatsortalinnik ikiorserneqarnissaminnut pisariaqartitaat isumagineqartalissammata.

Taamaattumik siunnersuutigissavara, qinersinerup kingorna pisassaqartut tassunga attuumassuteqartut tamarmik ISUMASIOQATIGIINNEERMUT qaaqquneqassasut, nunap aningaasaqarneranut inuiaqatigiillu peqqinnerannut iluaqutaasussamik, innuttaasut peqqinnerulernissaat nakuunerulernissaallu qanoq iliornikkut qulakkeernissaasa periarfissaat tassani oqallissutaassammata.

 

Inussiarnersumik inuulluarit
Anna Wangenheim
Demokraatit sinnerlugit Inatsisartunut qinersinermi qinigassanngortittoq
(immikkoortortaqarfimmi napparsimasunik paarsisut pisortaat)

Kontakt Os / Attavigisigut

Vi er ikke tilgængelig lige nu. Men du kan sende os en e-mail, og så vender vi tilbage til dig hurtigst muligt. Massakkut pissarsiarisinnaanngikkutsigut e-mailerpigisinnaavatsigut, uterfigissavatsigit piaarnerpaamik.

Atuarneqarsinnaanngila? Teksti allanngoruk. captcha txt