Del

Nappaateqalernermi tamatta nakorsarneqartussaavugut, tamannalu toqqissisimanarpoq. Toqqisisimananngitsorli tassaavoq, nakorsarneqarnerup nalaani nappaateqalersumut aningaasatigut kingunerlutitsisarnera inuuniarnikkullu artukkiisarnera ullut tamaasa tusartuagarput.

Napparsimallutik nakorsartittut suliffimminnillu qimatsigallartariaqartut, ingammik SIK malillugu akissarsiaqartut, aningaasatigut artukkerneqaannaratik aamma inuuniarnikkut ernumassuteqalersartut Nunatsinni amerlasoorpassuupput. Tamanna qangali ajornartorsiutaavoq.

Nappaammik kræftimik allanillu inuup toqqutigisinnaasaanik nappaateqalernermi sivisuumillu nakorsarneqartussanngornermi, suliffik qimallugu aningaasarsiorunnaarnermi inigisat allallu akilersukkat unitsinneqarneq ajorput. Kisimiillutik pilersuisut, tassa meeqqaminnik pilersuisut, tassani artukkerneqarnerpaasarlutik, tupinnagitsumik.

Tamanna manna allanngortinneqartariaqalerpoq.

Inunnut ikiorsiissutit innuttaasunillu sullissinerit kommuninit akisussaaffigineqarput. Sullissinerli aporfissarpassuarnik maleruagassanik inatsisinillu akimmisaartinneqartarpoq, sullitamut ilaanni kingunerlutitsisartunik.

Inunnik isumaginninnermut inatsisit aaqqissuunneqartaraluarput nalimmassarneqarlutillu, taamaattorli napparsimasunut ikiortarialinnullu oqilisaataaneri malunniunneq ajorlutik iluaqusiinernillu kinguneqaratik. Tamanna kommunit Namminersorlutik Oqartussallu suleqatigiilluarnerisigut aaqqinneqartariaqalerpoq, paasiniarneqartariaqarluni napparsimasunut ajornartorsiortitsilersarnerit sunik aallaaveqarnersut tamatumalu kingorna ikiorsiisarnermut inatsisit nalimmassaneqarluarlutik.

Nunarput atugarissaartutut innuttaasunillu sullissilluartutut taasarparput. Tamanna attatiinnassagutsigu namminneq piumassuserinngisaminnik napparsimalersunut artukkiisarnerput unitsinneqartariaqalerpoq ilaatigut aningaasanut inatsimmi atunngitsuukkat ilaat aalajangersimasunut atugassanngortinneqarnissaat siunniunneqartariaqarluni. Taamaaliornermi namminneq piumassuserinngisaminnik nappaatillit nappaateqalerumaartullu, ingammik SIK malillugu aningaasarsiallit, nakorsartereerneranni inuuneq artorsarfiunngitsoq taakkununnga atugassanngorteqqinneqartassalluni.

Allattoq:

Apollo Mathias Jeremiassen
Demokraatit sinnerlugit Inatsisartunut qinigassanngortittoq.

Kontakt Os / Attavigisigut

Vi er ikke tilgængelig lige nu. Men du kan sende os en e-mail, og så vender vi tilbage til dig hurtigst muligt. Massakkut pissarsiarisinnaanngikkutsigut e-mailerpigisinnaavatsigut, uterfigissavatsigit piaarnerpaamik.

Atuarneqarsinnaanngila? Teksti allanngoruk. captcha txt