Del

Katsorsaariaatsit assigiinngitsut atorneqalersinnaanissaat ilungersuutiginiarpara aamma atornerluisut ataasiakkaat katsorsaasumik katsorsaariaatsimillu nammineq toqqaasinnaanngornissaat sulissutiginiarpara.

Demokraatini nunatsinni atornerluinermik ajornartorsiuteqarnerput ilungersunarluinnartutut isigaarput.

Nammineq aalajangiisinnaanerujartornerput peqatigalugu soorunami sulisinnaasunik pisariaqartitsinerput alliartortussaavoq. Ullumikkutut nunatsinni taamatut ingerlagallartilluta immikkoortuni assigiinngitsuni avataaniik sulisussanik tikisitsisariaqartarpugut. Tamanna nammineq eqqumeequteqanngilat. Kisianni ilaatigut akissasinerup nalaani inuit suliartunngitsoortarnerat pissutigalugu tikisitsisariaqartassagutta ernumanarluinnarpoq.

Pingaarnersiueriaaserput sukumiisumik eqqarsaatigeqqittariaqarparput. Illuatungaani inissisimapput utoqqaat ima utoqqalinersiakitsigisut allaat ineqarnermut akiliisinnaarpiaratik. Utoqqalinersiallit aamma siusinaartumik pensionisiallit sulisartumik aappallit utoqqalinersiaminnik pensionisiaminnilluunniit ilanngartuunneqartarput. Ilinniartuuteqarpugut qaammatip naajartornerani ulluni kingullerni 10-ni 12-niluunniit iluamik nerisassarsiutissaqanngitsunik. Amerlaqaat arlaannik pissuteqartumik pisortanit ikiorneqarnissaminnik pisariaqartitsisartut ikiorneqarsinnaanerli ajorput saaffiginnikkaagamillu immikkoortortaqarfimmiit immikkoortortaqarfimmut aamma sullisisumiit sullissisumut nassiuteqattaarneqartarput,  pisortat nukissaqanngimmata imaluunniit akissaqanngimmata.

Tamatuma saniatigut innuttaasut amerliartorput sulisinnaagaluarlutik naliginnaasumik suliffeqarsinnaaneq ajortut arlaannik atornerluisuunertik pissutigalugu. Aaqqissuussineq ullumikkutut ikkallartillugu nukappassuit taamaasillutik “uninngatinneqartarput” pisortanillu pilersorneqarlutik. Nukiit taakku atortariaqarluarpagut qulaani taaneqartut utoqqalinersiallit, siusinaarlutik pensionisiallit ilinniartullu atugaasa pitsanngorsarnissaannut. Pisariaqanngitsumik milliuunerpassuit atortarpagut inunnik isumaginninnerup iluani sulissutigillannguarnagu atornerluisuunerup nungusarnissaa.

Imigassamik pinngitsuuisinnaannginneq nappaataavoq suliaqarfinnilu immikkut ilisarnaateqarluni ICD-10 (International Classification of Diseaces) nappaatitullu katsorsartariaalluni. Ullumikkut nunatsinni pinngitsuuisinnaanngitsortatsinnut katsorsaariaaseq atugarput, tungitsinniik sumiginnaanerujussuuvoq.

Qulequtaq paquminartoq kiisalu atornerluisuunerup ajoqutaanera paasiuminarsarumallugu meeqqanik sumiginnaaneq meeqqanillu ulloq unnuarlu angerlarsimaffinnut inissiisarneq eqqaaniarpara. Maannakkutut ikkallartillugu nunami maani ulloq unnuarlu angerlarsimafinni inissanik amingaateqarluinnalernikuuvugut. Meeqqamik tamakkununnga inissiisarneq ukiumut 860.670 koruunit aamma 1.402.330 koruunit akornanni akeqartarpoq meeqqap nammineq imminut oqartussaaffigilernissaata tungaanut imaluunniit allamut inissinneqarnissaata tungaanut. Eqqortuusinnaanngilaq inuiaqatigiittut tamatuma ingerlaannarnissaa akuerissagutsigu. Atagu nukigut atoriartigit angajoqqaat sanngiitsut sanngisunngortinnissaannut. Ikioqatigiilluta nunarput kiveriartigu.

Atornerluisup katsorsartinnissaanut paarlattuanik atortarpagut 21.000 koruuniniik 40.000 koruunit tungaannut apeqqutaalluni periuseq aamma sumiiffik. Neqeroorutit taakku iluannittarpoq ilaqutariinnut katsorsaanissamut neqeroorutit marluk. Nunarsuup sinnerani paasisat naapertorlugit atornerluisunik katsorsaanermi katsorsartittut 33  %-ii iluatsittarput. Tassa imaappoq 15- katsorsartikkaangata tallimat inuunerminni ingerlaqqittqarput qaatusimallutillu inuunertik ingerlatilertarlugu. Kisianni qaatuttartut ikinnerugaluarpataluunniit aningaasatigut naatsorsuinerup takutippaa katsorsartittartut 1 %-iinnaalluunniit qaatuttarpata tamanna aningaasaqarnikkut illersorneqarsinnaasoq.

Qanittukkut imigassamut inatsit nutaaq akuersissutigineqarpoq ilaatigut ajornartorsiutit ikilisarnissaannut inatsit iluaqusiissasutut oqaatigineqarpoq tamannalu immini ajunngilaq. Inatsilli qaammarsaanermik annertuumik malitseqartinneqarsimasuuppat aamma inunnik isumaginninnerup iluani sulisut assigiinngitsut  oqaloqatiginnittartullu annertuumik suliaqartinneqalersimasuuppata  taava nunatsinni atornerluinermut ajornartorsiutilinnut iliuuserineqartussatut pisariaqartinneqartut aallartilluarneqarsimassagaluarput.

Kisianni taamaattoqanngilaq, paarlattuanik IA -p aalajangerpaa aalajangersimasut kisimik katsorsaanermik ingerlataqassasut pilersillugulu ALLORFIK. Atornerluisunik katsorsaanermi namminersortut ipitinneqarput ikiorneqarnissaminnullu pisariaqartitsisut periarfissaannik arsaartorneqarlutik.  Suliniutip ajorneroriaqqiffissaqanngitsup pinngitsoorani kingunerissavaa meeqqat sumiginnakkat suli amerliartornissaat, ulloq unnuarlu angerlarsimaffinni inissanik suli amingaateqarnerulernissaq kiisalu atornerluisuuneq pissutaalluni pinerluttarnerit amerliartoqqinnissaat.
Ukiuni qulini kingullerni politikerinut eqeersaatigigaluarpara ajornartorsiutip qanoq annertutiginera aamma assigiinngitsunik katsorsaariaatsinik neqeroorutinik peqarnissaq qanoq pisariaqartigisoq. Kisianni ukiut qulit kingulliit ingerlanerini immikkoortumi ajornartorsiutit alleriaannarnikuupput.

Inatsisartunut qinersinissaq qanittukkut suaarutigineqarmat nalornissuteqarnanga aalajangerpunga. Silataaniik isiginnaartooqqinnianngilanga – nammineq qinigassanngortittariaqarpunga. Inuit ataasiakkaat toqqaanissaminnut kiffaanngissuseqartitaanissaat upperaara aamma inuit ataasiakkaat imminnut akisussaaffiginerat. Upperaara tamatta ataasiakkaarluta eqqortumik ikiorneqarutta piumassuseqaruttalu sunaluunniit angusinnaagipput. Upperaara inuit allanngorsinnaanerat. Uanga aaqqiissutissanut tappissuuvunga ajornartorsiutinuunngitsoq. Ataatsimoorutta sunaluunniit angusinnaavarput. Taamaattumik Demokraatit sinnerlugit sassarpunga.

Inussiarnersumik inuulluaqqusillunga
Bo Martinsen
Demokraatit sinnerlugit qinigassanngortittoq

Kontakt Os / Attavigisigut

Vi er ikke tilgængelig lige nu. Men du kan sende os en e-mail, og så vender vi tilbage til dig hurtigst muligt. Massakkut pissarsiarisinnaanngikkutsigut e-mailerpigisinnaavatsigut, uterfigissavatsigit piaarnerpaamik.

Atuarneqarsinnaanngila? Teksti allanngoruk. captcha txt