Del

Attartornermut akiliutip appartinnissaa amerlanerit siutaanni tusarnersupilussuussaaq. Nuannissagaluaqaarmi qaammammut appasinnerusumik akiliisalissagaanni. Kisianni inuunermi sunaluunniit akeqanngitsumik pineqarsinnaanngilaq. Landskarsi kommunillu karsii amingaateqalissapput attartornermut akiliut appartinneqassappat kingunerissavaalu allanut atugassakinnerulerneq.

 

Amerlaqisugut piumagunarparput sapinngisamik amerlanerpaanik aningaasaateqarnissarput inuunermi nuannersunut atugassaqarniassagatta. Rødvinimut pitsammut nerinermi iggisissamut, meeqqanut mamakujuttut amerlanerit tallimanngornikkut aamma ilaquttallu sullinngiffeqarluni angalalluarnissamut.

 

Attartornermut akiliutit, akiligassanut biilimut benziinamut aningaasartuutit tamatta millisarusuppagut nuannersunut akissaqarnerujumalluta.

 

Immaqa tamakkorpiaat pissutaapput politikerip siumumeersup Erik Jensenip attartornermut akiliummik appaaniarneranut? Attartornermut akiliut minneruppat taava nammineq atugassat amerlanerussapput. Kisianni allanngilaq Erik Jenseip puigoraa attartornermut akiliutit piginnittuinnarmut nakkarneq ajormata. Attartornermut akiliut atorneqartarpoq aserfallattaaliinermut iluarsaassinermullu aamma pisariaqarluinnarput maani innuttaasut pitsaasunik ineqartinneqassappata. Attartornermut akiliut apparneqarpallaarpat inigut nakkaakkiartulissapput tamannalu arlaannattaluunniit kissaatigigunanngilaa.

Erik Jensen aamma oqarpoq attartornermut akiliut piginnittup iluanaarutaata peerneratigtu apparneqarsinnaasoq. Aningaasaliisartut namminersortut qassimmata inissaqarneq aningaasaliiffigerusussavaat iluanaarutissaqanngikkunik? Eqqoriarpara piumasoqarnavianngitsoq.

Tamatuma saniatigut inissianut attartortittakkanut piginittut tassaanerupput pisortat – tassa Namminersorlutik Oqartussat aamma kommunit, aningaasanik amingaateqalersussat, piginnittup iluanarutaa peerneqassagaluarpat. Tassami piginnittup iluanaarutaa attartornermut akiliummiit peerneqassappat tamanna landskarsimut 37 millioner koruuninik akeqassaaq ukiumut taakkulu qaavisigut aamma kommunit milliuunerpaalunnik amingaateqalertussaassapput aamma attartortittakkanik inissianik peqartutut taamaattumillu annaasassamik matussuserneqarnissaannik piumasaqanngitsoortussaanngillat. Erik Jensenip qinersisartut suli oqaluttuutinngilai taakku annaasarpassuit qanoq matuneqassanersut.

Misiliigaluarpoq erfattunik oqalulluni tassa ineqarnermut tapit sipaarfigineqarumaartut attartornermut akiliut appartinneqarpat. Naatsuutit taakku takorusunnaqaat. Ineqarnermut tapit sipaarfigineqalaalaassajunnarsipput kisianni imaanngilaq ineqartut tamarmik ineqarnermut tapimik tunineqartartut.  Aamma imaanngilaq attartornermut akiliutikkut appaanerit tamarmik matuneqarumaartut, tassa attartornermut akiliut apparpat ineqarnermut tapit sipaarfigineqassaqqaartut.

Uanga isumaga naapertorlugu Erik Jensen kusanaatttorujummik qinersisussarsiorpoq.

Uanga aamma attartortut pitsaanerusumik atugaqalernissaat suleqataaffigerusuppara kisianni suleqataaffiginavianngilara neriorsueqattaarnissaq kinguneqartussaanngitsunik. Qinersereerutta ulluinnanngoqqittussaavoq. Ulluinnanngoqippat politikerit uangut oqaloqatigeeqqittariaqartussaavugut paasiniarlugu qineqqusaarnermi neriorsuutit sorliit piviusunngortinneqarsinnaanersut. Ulluinnanngoqqippat Erik Jensen imaannaanngitsorsiortussaavoq qinersisartunut artornartorujummik neriorsuuteqarami.

Inussiarnersumik inuulluaqqusillunga
Justus Hansen
Demokraatit sinnerlugit qinigassanngortittoq

Kontakt Os / Attavigisigut

Vi er ikke tilgængelig lige nu. Men du kan sende os en e-mail, og så vender vi tilbage til dig hurtigst muligt. Massakkut pissarsiarisinnaanngikkutsigut e-mailerpigisinnaavatsigut, uterfigissavatsigit piaarnerpaamik.

Atuarneqarsinnaanngila? Teksti allanngoruk. captcha txt