Del

Hash inuiaqatigiinni ajornartorsiutaavoq aamma tamanna innuttaasut amerlanersaasa nalunngilaat. Inuiaqatigiinnut akisuupilussuuvoq aamma innuttaasunut ataasiakkaanut akisuupilussuanngorsinnaavoq.  Tassa inuiaqatigiinnut aningaasartuutaavoq aamma inunnut ataasiakkaanut inuttut akeqarpoq. Hash pissutaalluni nunamiit aningaasarpassuit aniatinneqartarput matumanilu eqqartorpagut milliuunilikkaat. Aningaasamininnguit anissorneqartarnerat pineqanngilaq. Inuiaqatigiit ajornartorsiut akunnerminniitissallugu akissaqanngillat sualummik anguniarutsigu naalagaaffinngornissarput.
Hash ataasiakkaanut atuisunut/atornerluisunut sunniuteqarinnaavoq. Haship atungaanera inummiit inummut assigiinngilaq. Misissuinerit takutippaat hashimik atuineq annerutillugu taava kingunerusarput: Atuanngitsuukulanerit aamma suliartunngitsuukulanerit, atuisut/atornerluisut ilinniartarput sivikitsuinnarmik, hashpsykoseqalernissaminnut qaninnerusarput. Hashpsykosep kingusinerisinnaavaa imaakajaarluni tarnikkut aveqqaneq/ skizofreni.

Aamma inuiaqatigiit aningaasarsiornerannut kinguneqarnerlussinnaavoq, sulisussaagaluit annaaneqartarmata aamma peqqinnissaqarfimmi aningaasartuuteqartoqartarmat.  Uanga nammineerlunga ajoraluartumik qanimut takunikuuakka inuusuttunnguit hashpsykoseqalersimasut allatut ajornartumik napparsimavimmut unitsinneqartariaqarsimasut katsorsarniarlugit. Inuusuttummi taakkuupput qaratsamikkut innarlerneqarnissaminnut qaninnerpaasartut, inuusuttullu taakkuupput nunatta siunissai.

Hash inerteqqutaavoq aamma inerteqqutaajunnaarsinneqarnissaa oqallisigineqassanngilarluunniit. Demokraatini nalunaarutigereernikuuarput haship inerteqqutaajunnaarsinneqarnissaa akerleralutigu. Ilumoorporli Demokraatini ikiaroornartup oqallisigineqarnissaa qaqinneqarnikuummat pineqartormi assigiinngitsunik nassataqarsinnaammat. Hasheqarpoq aamma nakorsaateqarpoq cannabisimik, pingaarluinnarpoq taakku immikkut avissaartinneqarnissaat. Uani tusagassiutinut nalunaarutinni qitiutippara inerteqqutaasoq hashi.

Ilaqutariippassuupput arlaatigut hashimik kalluarneqarsimasut. Atuisorpassuummata aamma inuppassuit akornanni  atorneqarnera akuerineqarnikuuvoq.  Sumi tamaani aqqusinerni isertuarani nioqqutigineqartarpoq, tassani allaat inuusuttuarannguit nikorfasinnaasarput tuniniaallutik.  Innuttaasorpassuarnut tamakku isiginnaarlugit nukillalaarnartarpoq aamma toqqissimajunnaarsitsisarpoq. Innuttaasut imminnut aperikkajuttarput: “Sooruna ersittorsuarmik tuniniaaneq suneqarneq ajortoq?”

Ajornartorsiut ilumoorluta iliuuseqarfigissagutsigu Politiit, Akitsuuserisut peqqinnaqarfillu kisiisa isumalluutigisinnaanngilagut. Aamma pineqartumi periuserineqartartut ingerlatiinnarsinnaanngilagut. “Nuna tamakkerlugu  hash pillugu suliniuteqarnissamut pilersaarut 2016” sakkussatsialaavoq aallarniutigalugu atorsinnaasarput. Suliniuteqarnissamut pilersaarummi suliniutissatut innersuussutigineqartut ilaat allartinneqareerput.

Anngiortumik eqqussorneqartartut  ilaannamininngui timmisartukkut eqqussorneqartarput, isiginngitsuusaassanngilarpullu timmisartumut ilaasut eqqusseriartinneqartarmata timmisartoqarfinnimi ikiaroornartumik hashimik arsaarinnittarneq ataavartumik pisarpoq. 2017-mi hashi annertooq “Polar Nanoq”-mi nassaarineqarpoq. 2009-mi politiit aatsaat taama hashimik angitigisumik ataatsikkut arsaarinnissuteqarput Kalaallit Nunaata kujataani  118 kilo umiatsiamik annguteriaraluarneqartoq arsaarinnissutigineqarmat. Taamaattumik imaatigut eqqusseriartarneq akiorniarlugu suliniutit amerlisariaqarput.

Inuiaqatigiinni nukiit amerlanerusut atorlugit hashimik ajornartorsiuteqarneq akioriartigu. Politikkikkut oqartussaaffiit assigiinngitsut soorlu RAL-mik, kilisaanik aamma umiarsualivinnik suleqatigiinnerunissaat aammaattariaqarparput. Suleqatigiisitaliortariaqarpugut tigussaasumik imaani suliniartussamik. Tassanimi anngiortumik eqquteriarneqartut amerlanersaat nassaarisarpagut.
Piffissanngorpoq allaanerusumik eqqarsarnissamut aamma piffissanngorpoq inuiaqatigiinni nukiit katersornissaat ajornartorsiut akiorniarlugu.

 

Kasper Berthelsen
Demokraatit sinnerlugit qinigassanngortittoq

Kontakt Os / Attavigisigut

Vi er ikke tilgængelig lige nu. Men du kan sende os en e-mail, og så vender vi tilbage til dig hurtigst muligt. Massakkut pissarsiarisinnaanngikkutsigut e-mailerpigisinnaavatsigut, uterfigissavatsigit piaarnerpaamik.

Atuarneqarsinnaanngila? Teksti allanngoruk. captcha txt