Del

Inuusuttorpassuit ilinniareerlutik  ajoraluartumik aalajangertarput nunani allaniiginnarniarlutik. Initaarnissamut ileqqaartarnerup amerlanerit angerlartittalissagaluarpai nunatsinnut iluaqutaasumik piginnaasaminnik atuisussanngorlugit.

 

Ernumanarpoq qineqqusaarutigineqartut pingaarnersarimmassuk naalagaaffinngornissaq naak takuneqanngitsoorsinnaanngitsoq inuppassuit nunanut allanut norartut uffa kalaallit 16.000-t Danmarkimi aamma najugaqareersut. Ukiut kingulliit kingumut qiviaraanni aamma sulisinnaasut ikileriarujussuarnikuupput naak ilinnialersinnaasut amerliallannikuugaluartut. Ernumanarluinnarpoq, uangalu takusinnaasakka naapertorlugit ilinniartitaanermut periuseqarpugut innuttaasut iluaqutaannik kisiannili nunat allat iluaqutissarsivigisartagaannik.

 

Sulisinnaasut ikileriarujussuarnerisa kinguneranik ikinnerusut isumalluutigineqalissapput inuusuttut amerlanerit ilinniariartalerpata aamma inuit 50-t sinnerlugit ukiullit amerliartuinnartut sullinnissaanni.

 

Ineriartorneq tamanna mumisittariaqarparput aamma taamaattumik ileqqutoqqat qimallugit nutaamik eqqarsartariaqarpugut.

 

Inuusuttorpassuit angerlaqqinngitsoortarput inissaqannginnamik. Inuusuttut taakku atorfissaqartippagut aamma taamaattumik pilersaarusiortariaqarparput taakku angerlaqqinnissaat qanoq pilerinarnerulersissinnaanerlutigu. Periuseqartariaqarpugut inuusuttut angerlaqqikkaangamik akissaqartitaminnik illusisinnaalersillugit. Tassanilu siunnersuutigaara; SU aqqutigalugu initaarnissamut ileqqaartalernissaq.

 

Taggeriartigu ilinniarneq ukiunik 4-5-nik sivisussuseqakkajuttartoq meeqqat atuarfiannik soraarummeernerup kingorna. Aamma taggeriartigu ilinniagartuunngorniarnermi ukiut 3-8-t atorneqartartut ilinniarnertuunngorniarfik ilanngutereerlugu, tassani apeqqutaatinnagu sumi ilinniarneq ingerlanneqarnersoq, nunami maani inunngorsimagaanni, peroriartorsimagaanni ilinniarnerlu maani nunani aallartissimangaanni.

 

Ilinniarnersiutisiat assersuutigalugu 850 koruuninik qaffakkaanni, taakkulu qaammatit tamaasa ineqarnermut ileqqaarfissamut tigusiffigineqarsinnaanngitsumut qaammatit tamaasa nakkartittarlugit taava ilinniarneq naammassigaanni katersarineqarsimassapput 40.800 koruunit 51.000 koruunillu akornanni.

Ilinniartuunngorniarnerlu naammasseriarlugu ilinniagartuunngorniarluni aallartissimangaanni taava 30.600 koruunit 81.600 koruunillu akornanni katersorneqarsinnaassapput.

 

Aningaasat taakku ilinniartut ilinniarnerminni katersarisimasaat illusinermi aallarniutitut atorneqarsinnaapput, suliffitsik aqqutigalugu initaartariaarullugit aamma nunami maani nujugaqarsinnaanngorlugit.

Aningaasat ileqqaarsimasat taamaallaat tunniunneqarsinnaassapput Kalaallit Nunaanni najugaqarniarlutik aalajangerpata. Ilinniartup ilinniareernermi kingorna nunani allani najugaqarnissani aalajangiuppagu, aningaasat Landskarsimut uterteqqinneqassapput.

 

Tamanna ilinniareernerup kingorna angerlaqqinnissamut kajumissaataassaaq.

 

Eqqarsariarta inuk sulilersoq.

Kalaallit Nunaanni aningaasarsiat tamakkiisut 185.904 koruunit 229.056 koruunillu akornanniippoq taamaasillutillu 78.000 koruunit 96.203 koruunillu akornanni akileraarutigineqartarput.

 

Allatut oqaatigalugu ineqarnermut ileqqaarnissamut inuiaqatigiit aningaasaliissutaat uterteqqinneqartassapput ukiualunnguit ingerlanerinnaanni. Paarlattuanik kalaaleq nunamini najugaqarusuttoq ilinniarsimasorlu sulisorineqalissaaq inuiaqatigiinnut suliffeqarnermullu aamma ilapittuutaalerluni.

 

Sulisartut amerlippata amerlanerusut naalagaaffinngornissamut akileeqataasinnaalissapput kivitseqataallutillu imaluunniit oqartussaaffiit suli tiguneqanngitsut sukkanerusumik tiguneqarsinnaalissagaluarput.

 

Imaassinnaavoq killilersungaanngitsumik kiffaanngissuseqarluni ingerlatsisoqalernissaanut illersuisutut aningaasanik tunioraaneq eqqoqqissaartutut isiginngikkiga, kisianni kalaallit ilinniartut nunatsinnillu kivitseqataasussanik suli amerlanerusunik annaasaqarnissatsinnut akissaqanngilagut.

 

Kommunit tamarmik pingaarnerusumik illoqarfiit ineriartortinnissaannut pilersaaruteqartuuppata siunertaralugu nammineq illugisat amerlanerulernissaat suliniut manna inissaqartinneqarsinnaagaluarpoq.

 

Nuup,  Kalaallit Nunaanni illoqarfiit pingaarnersaattut siunertaraa 30.000-nik innuttaqalernissani. Sinerissaminngaanneersinnaanngillat taamaattumik kalaaleqatitta ilinniareeraangamik angerlarteqqittarnissaat anguniartariaqarparput.
Ïsumassarsiaq manna Qaqortumi pingasunngornermi ulloq 11. apriili Niunernermik Ilinniarfimmi qineqqusaarnermi ilassilluarneqarpoq, ilinniartup taannarpiaq apeqqutigimmagu.

Inussiarnersumik inuulluaqqusillunga
Malene Vahl Rasmussen
Demokraatit sinnerlugit qinigassanngortittoq

Kontakt Os / Attavigisigut

Vi er ikke tilgængelig lige nu. Men du kan sende os en e-mail, og så vender vi tilbage til dig hurtigst muligt. Massakkut pissarsiarisinnaanngikkutsigut e-mailerpigisinnaavatsigut, uterfigissavatsigit piaarnerpaamik.

Atuarneqarsinnaanngila? Teksti allanngoruk. captcha txt