Del

Tuluit pillugit tuluttut ilinniassanngilatit. Aamma danskisut ilinniassanngilatit danskit pillugit. Oqaatsit taakku ilinniassavatit ilinniarnissannut aamma suliarerusutannik suliaqalernissannut periarfissarpassuarnik ammaattussaammatsit.

Tamatta isumaqatigiissutigaarput Kalaallit Nunaanni pisortatigoortumik oqaatsit tassaammata kalaallit oqaasii. Taamaakkaluartorli oqaatsit pillugit oqallinneq sakkortuseqqippoq inuppassuillu misigissusaat qaffakaatillugit. Misigissutsit aallaqqaammut nunatsinni politikerinit qaffatsinneqartut taakkorpiaammi aqunnikuuaat innuttaasunullu takutillugu qanoq pissusilersortoqassanersoq aamma qanoq isummersortoqassanersoq taagorneqartumut Danmarkitut aamma danskit oqaasiinut.

Allaanngilaq isumaqartoqartoq danskisut ilinniartoqartassasoq danskit pillugit. TAMANNA kukkunerujussuuvoq. Danskisut ilinniassaagut immitsinnut pilluta inuunermi periarfissiimmata.

Ukiut kingulliit 40-t ingerlanerini politikkikkut sapiissuseqartoqarsimasuuppat isumagineqareersimassagaluarpoq kalaallisut, danskisut tuluttullu kikkut tamarmik ilinniartarnissaat.

Ajoraluartumilli tusaqqusaartoqartuarpoq oqaluttunik kalaallisut oqalussinnaagutta siunissarput qularnaassagipput. OK, Ilinniarnertuunngorniarnerup kingorna kalaallisut ilinniarneqarsinnaasunik takkuttoqarnikuuvoq, amerlanngillalli. Qularutigineqassanngilluinnarporli danskisut tuluttullu piginnaanikinnerup assigiinngitsunut ilinniarnissaq killilersortarmagu, taamaattumik ukiuni kingullerni 40-nngulersuni kikkunuku salloqittarneqartut?

Meeqqat inuusuttullu inuunerminni ingerlaqqittussat. Angajoqqaammi politikerillu suliassaraat meeqqanut innuttaasunullu periarfissanik pitsanngorsaanissaq. Politikerilli tamanna sapiissuseqarfigisimanngilaat – qularnanngitsumik ingasattajaarlutik kalaaliuniat itsarlu atungarliortitaasarsimanermik oqaluttut taaneqanngitsoornissartik annilaanngatigimmassuk.

Sapiissuseqarnissaq takutinnagu ukiut kingulliit 40-t ingerlanerini “uangut” “taakkulu” akornanni ajortussarsiortitserujoornikuupput paasititsiniutiginagu tamatta kalaaliusugut. Taamatut pissuseqarsimanerup kinguneranik tamatta ajorsarpugut aamma imaassinnaavoq naalagaaffinngornissarput anguniarlugu sulinitsinni ukiut 40-t annaasimagigut.

Inussiarnersumik inuulluaqqusillunga
Morten Funch
Demokraatit sinnerlugit qinigassanngortittoq

Kontakt Os / Attavigisigut

Vi er ikke tilgængelig lige nu. Men du kan sende os en e-mail, og så vender vi tilbage til dig hurtigst muligt. Massakkut pissarsiarisinnaanngikkutsigut e-mailerpigisinnaavatsigut, uterfigissavatsigit piaarnerpaamik.

Atuarneqarsinnaanngila? Teksti allanngoruk. captcha txt