Del

Aalisarnermik inuussutissarsiuteqarnermut atugassarititaasut pitsaanerusut pilersikkutsigit nunatta tamarmi nukittunerusumik inissisimalissutigissavaa. Iluatsitsilluarnerlu iluatsitsilluarnermik pilersitseqqittarmat, aalisarnermik inuussutissarsiuteqarneq nukittooq suliaqarfinni allani suliffinnik siuariartornermillu pilersitsissaaq. Tamanna Kalaallit Nunaannik nukittunerulersitsissaaq namminiilivinnissamullu tamatsinnit kissaatigineqartumut tunngavisseeqataalluni.

Nunarput aningaasarsiornikkut isumaginninnikkullu nukittuumik inissisimassappat, uagut politikeriusugut suliffeqarfiit nutaat pioreersullu ineriartorsinnaanissaat qulakkeerniarlugu aningaasarsiornikkut politikkikkullu atugassaqartitsisariaqarpugut.

Aalisarnermik suliffissuaqarneq ilaqutariippassuarnut inuiaqatigiillu aningaasaqarnerannut tamarmiusumut pingaaruteqarluinnarpoq. Imartatta aalisakkanik qalerualinnillu pissaqartitsilluartut aningaasarsiorluarnissatsinnut periarfissaqarluartippaatigut.

Inuussutissarsiortut nukittuut nuna tamaat pisuujunerulersissavaat

Aalisarnermik suliffissuaqarnerup inuiaqatigiinnut pingaaruteqartupilussuunera pissutigalugu uagut politikerit inuussutissarsiuut asuli pissanngilarput – naaggaluunniit. Qularnaatsunik atugassaqartitsissaagut, aalisartunut, ilaqutariinnut inuiaqatigiillu tamarmiusut eqqarsaatigalugit iluaqutaasussanik.

Aalisarnermik suliffissuaqarneq niuernikkut ingerlatsinikkut qularnaatsunik atugassaqartinneqassaaq. Assersuutigalugu pisassiissutit tunniunneqartut utertinneqariartaannginnissaat qularnaveeqquserneqassaaq. Qularnaveeqquserneqanngippammi aningaaseriviit arlaalluunniit angallatinut nutaanut pitsaasunut aningaasaliinissamut taarsigassarsititsiumanavianngilaq.

Politikerit akisussaassuseqartut nalunngilaat atugassarititaasut qularnaatsut inuussutissarsiortut aningaasaleerusussussaannut toqqammavissaasoq pingaarutilik. Atugassarititaasummi qularnaatsut kisiisa aqqutigalugit aalisarnermik suliffissuaqarnerup ineriartorneq nutaaliornerlu pisariaqartut pilersissinnaavai, taamaaliornikkullu suliffinnik amerlanerusunik, siuariartornermik annertunerusumik atugarissaarnermillu annertunerusumik pilersitsilluni.

Taamaammat inuiaqatigiinnut iluaqutissartaata annertunerulersinneqarnissaa pineqarpoq. Aalisarnermik suliffissuaqarnerup ullumikkut qaffasissumik akileraarusersuiffigineqarlunilu akitsuusersuiffigineqarneratigut aningaasanut inatsimmi putunik matooraanermut aallerfissatut atorneqarnera partiillu saamerliusut agguaasseqqinnissamut politikkiannut atorneqarnera politikerit maanna issiasut inuussutissarsiuteqarnerup inuiaqatigiinnut tamanut iluaqutaasussamik qanoq ineriartortinneqarsinnaaneranik paasisimasaqanginnerannut takussutissaavoq.

Aalisarneq pillugu inatsit nutaaq nunatsinnut iluaqutaasussaq pisariaqartinneqarpoq

Aalisarneq pillugu inatsimmut allannguutissatut siunnersuutigineqartut inuussutissarsiutip nukittunerulernissaanik qulaakkeerinavianngillat- naaggaluunniit. Suliammi annerpaartaa inuussutissarsiornermik qullersanit pigineqartumik agguaasseqqinnissamillu eqqarsartaatsimik sunnerneqarsimammat. Taamaammat alloriarneq siulleq tassaavoq nassuerutigissallugu aalisarnermik inuussutissarsiuteqarneq nunani tamalaani ingerlatalinnut angisuunut unammillernermat, taamaammallu unammillersinnaassuseqarnerup naammassisaqarsinnaassutsillu annertusarnissaat pineqarlutik.

Maannakkut aaqqissuussaaneq aalajangiusimaannarlugu aalisarnermi nunarsuarmi siuttuunissamik sinnattuaqilluni takorluuinerit – kingullermik IA-p siulittaasuanit saqqummiunneqartut – iluareqqusaarneriinnaapput, qinersisartunik uukapaatitsinerullutik inuussutissarsiummillu, tassungalu ilanngullugu inuiaqatigiit aningaasaqarnerannik nalinginnaasumik paasisimasaqannginnermut ersiutaallutik.

Aalisartut suleriaqqinnissamut peqataatinneqassapput

Aalisartut aalisagaqassuseq pillugu, aamma sumi qanorlu piujuaannartitsinissamik tunngaveqarluta pitsaasumillu aalisarsinnaanitsinnut ilisimasanik annertuunik pigisaqarput. Taamaammat aalisarnermik inuussutissarsiuteqartut tusarniaqqaarnagit inatsimmik nutaamik akuersissuteqassanngilagut.

Tamatuma saniatigut pisassiissuteqartarnermut akitsuusersuinermullu aaqqissuussineq ima aaqqissuuttariaqarparput inuiaqatigiinnut inuussutissarsiuteqartunullu tamanut iluaqutissartaqartillugu. Taamaaliussagaanni soqutigisallit tamarmik naammagisaannik politikkikkut qulakkeerneqarsinnaanngitsoq uagut politikerit nassuerutigisariarparput. Taamaammat oqimaaqatigiissitsinissaq eqqortoq nassaarineqartariaqarpoq, sulinerlu ammasumik ingerlatsinermik tunngaveqarluni.

Inatsisissatut siunnersuummi atorunnaartumi kisitsisit amerlavallaartut uppernarsaatissaqartinneqanngillat

Taamaammat aalisarnermik inuussutissarsiuteqartut kattuffiisalu qinersinerup kingorna aalisarneq pillugu inatsimmut nutaamik inassuteqaateqarnissaat qulakkeertariaqarparput. Inassuteqaatigineqartut kingunerisassanik misissueqqissaarinernik kingunerisassanillu naatsorsuinernik tunngaveqassapput, taamaaliornikkut suliniutit assigiinngitsut aalisarnermut – minnerunngitsumillu inuiaqatigiinnut – qanoq sunniuteqarnissaat ersarissumik takutinneqarniassammat.

Kingunerisassanik misissueqqissaarinerit periarfissanik arlalinnik tunngaveqassapput, arlaannaanulluunniit attuumanatik, tunngavilersorluagaallutik kiisalu iluaqutissat ajoqutissallu ersersinneqarlutik. Allaanerulaartumik oqaatigalugu, aalajangiinissamut tunngavilersorluakkamik tunngavissamik pilersitsisoqassaaq.

Aalisarnermik inuussutissarsiuteqarneq nukittooq aalisarneq pillugu inatsimmuinnaq tunngassuteqanngilaq

Aalisarnermik inuussutissarsiummik nukittuumik pilersitsissagutta uagut politikeritut aaqqiissutissat tamakkiisut isiginiartariaqarpagut. Taamaammat pissutsit sapinngisamik annertunerpaamik nalitusaanissamut sunniuteqarsinnaasut tamaasa misissortariaqarpagut.

Aallarniutigalugu nassuerutigisariaqarparput atortulersuutit, soorlu umiarsualiviit annertuupilussuarmik pingaaruteqarmata. Tamatumunngalu atatillugu nunaminertat sanaartorfissat, innaallagissamut imermullu pissutsit, inissiat paaqqinnittarfiillu pingaarutilimmik inissisimapput. Tamatumanilu nassuerutigineqartariaqarpoq inuussutissarsiummi ineriartornissamut periarfissat annerpaartaat nunaqarfinniimmata.

Sulisut piginnaasaat, suliffimmik pingaartitsinerat, nuttarnermut pissutsit allallu aamma pingaaruteqarluarput. Tunisassioriaatsimut inaarinani tunissassiornermik tunngaveqartumut tamakkiinerusumillu tunisassiorsinnaanermut sulisussaqarniarneq apeqqutaanerpaasarpoq. Tamatumanilu annertunerujussuarmik nalitusaanissamut periarfissaqarluarpoq. Taamaammat alloriarneq siulleq tassaasariaqarpoq inatsisiliornerup, sulileriaannaasutut immikkoortumi 1-imi inissinneqarsimasut suliffeqarnerup avataanut imminut inissinnissamut ajornanngitsitsivallaartup sukateriffigineqarnissaa. Aalisakkeriviit illoqarfinni suliffissarsiortutut taasanik imannaannaq inoqartuni sulisussaaleqinerat pissusissamisuunngilaq.

Akileraarutit akitsuutillu qaffasissusiat akilersinnaassutsimut aalajangiisuulluinnartuupput, taamatullu aamma inuussutissarsiummi aningaasaliisinnaassutsimut. Inuussutissarsiummi aningaasaliinikkuinnaq ineriartorsinnaavoq inuiaqatigiinnullu suli annertunerusumik iluaqutaalluni. Taamaammat ingerlatseqatigiiffinnut akileraarut appartinneqassaaq aamma HFI-sinerissami akitsuut 5 %-iusoq peerneqassaaq.

Namminersortunngorsaaneq unammilleqatigiinnerlu

Inuussutissarsiornerup ineriartortinneqarnissaanut akimmisaartitsinerpaasoq tassaavoq suliaqarfimmi annerpaasoq pisortanit pigineqartoq Royal Greenland A/S. Ingerlatseqatigiiffiup sumiiffiit ilaanni toqqaannartumik kisermaassisuunera pissutaalluni, naallu assersuutigalugu Upernaviup pigisaani tunisinermut akit appasissut pissutigalugit sinneqartoorutit atorlugit amigartooruteqarfiusunut ikiorsiinerit aqqutigalugit sunniutikitsumik ingerlatsigaluarluni, tunisinermut akinik nioqqutinik tunisat akiisa nammassinnaanngisaannik atuinissamut periarfissaqartuaannassaaq, soorlu assersuutigalugulu Nuummi.

Demokraatini unnammilleqatigiinneq 100%-imik tapersersorparput. Suliffeqarfiit namminersortut akornanni unammilleqatigiinneq pineqartillugu. Taamaammat assersuutigalugu IA-mut tunngatillugu akerlianik isumaqarluta ingerlatseqatigiiffik nukittorsartariaqarsorinngilarput – aamma ingerlatseqatigiiffik allanut maligassiuisutut isiginngilarput. IA-p siulittaasuata taamatut isummersornera kommunistit eqqarsartaasiannut qaninnerannut ersarilluinnartumik ersersitsivoq.

Demokraatini qularinngilluinnarparput ingerlatseqatigiiffiit namminersortut inuussutissarsiut suli pitsaanerusumik kisivissinnaagaat nunamut tamarmut iluaqutaasumik. Tamatuma saniatigut aamma eqqumaffigaarput sinerissami aalisartut – pingaartumik nunaqarfinniittut – ajorluinnartunik atugassaqartitaanertik ukiorpassuarni nilliaatigisarsimagaat, tamannalu allanngortikkusukkaat Royal Greenlandip A/S aggulunneratigut imaluunniit ingerlatseqatigiiffinnik pilersitsinikkut. Ingerlatseqatigiiffinnut pisortat pigisaannut unammillertussanik ingerlatseqatigiiffinnik  pilersitsinissaq ajornarluinnangajappoq, ingerlatseqatigiiffiit taakku sallersaallutik inissisimanerat aningaasalersuisarfinnit ilisimaneqarmat.

Anguniakkat qanorlu iliornissamut nukissaqarneq

Aalisarnermik inuussutissarsiutip nunamut tamarmut iluaqutaasumik nukittuumik inissisimanissaa qulakkiissagaanni, uagut politikerit takorluuisinnaassuseqartariaqarpugut qanorlu iliornissamut nukissaqarluta. Demokraatit anguniagaat tassaavoq nunamut tamarmut iluaqutaasussamik inuussutissarsiummik suli nukittunerusumik pilersitsinissaq. Taamaammat inuussutissarsiutip akilersinnaassusia, aningaasaliisinnaassusia, nutaaliornissamut nukissaqassusia, suliffissanik pilerinartunik pilersitsinissaa, siuariartornissaa atugarissaarfiunissaalu ukkatarineqartariaqarput. Tamanna aalisartunut, ilaqutaannut inuiaqatigiinnullu tamanut iluaqutaassaaq.

Inuss. Inuull.
Niels Thomsen
Demokraatit sinnerlugit qinigassanngortittoq

Kontakt Os / Attavigisigut

Vi er ikke tilgængelig lige nu. Men du kan sende os en e-mail, og så vender vi tilbage til dig hurtigst muligt. Massakkut pissarsiarisinnaanngikkutsigut e-mailerpigisinnaavatsigut, uterfigissavatsigit piaarnerpaamik.

Atuarneqarsinnaanngila? Teksti allanngoruk. captcha txt