Del

”Ajoraluartumik atorfinitsissinnaanngilatsigit misilittagaqannginnavit”. Inuusuttut ilinniakkaminnut naammasserlaat nunatsinni suliffissarsioraangamik uggornaqisumik taamatut akineqartarput. Ajornartorsiummut aaqqiissutissamik nassaartariaqarpugut aamma uanga nammineq inuusuttagut pikkorissorsuit piginnaanerminnik pisinnaasaminnillu ilinniartuunermik aallartisimalernerani takutitsinissaannut periarfissikkusuppakka. Periarfissaqarpugut taamaallaat atorneqaannartussaavoq.

 

Nunarsuarmioqataalluta inoqqataavugut. Nunarsuarmi unammilleqatigiiffusumi inuuvugut aamma uangut politikerit inuusuttagut Kalaallit Nunaannik sullisserusuttut pilerisaarutigisussaavagut aqqutissiuullugillu. Isumaqarpunga uangut politikerit ajornartorsiutinik suliassatsinnillu eqqartuiinnarpallaartugut, iluarsiiniataqarata. Pisariaqarluinnaqqissaarpoq siunissami oqalutinnarata iliuuseqartarnissarput.

 

Inuusuttagut ilinniariarlutik aallaraangata nalunaarsorneq ajorpagut suna ilinniariartorlugu aallartarnersut aamma sumut atorsinnaassanerigut. Siunissami imaattariaqarpoq, inusuttatsinnik qarasaasiamut nalunaarsuisalissasugut. Taamaasilluta qularnaassavarput inuusuit ilinniarnertik tamakkerlugu malinnaavigineqarnissaat, tassani takusinnaallugu ataasiakkaat sumut ilinniarnersut. Aamma qularnaassavarput inuusuttut ilinniarniarlutik qinnuteqarneranniit sulilernissaannut malinnaavigisarnissaat. Allatut ajornartumik ataasiakkaarlugit malinnaavigisariaqarpagut ilisimassallugulu sumut killinnersut aamma sumut ilinniarnersut.

 

Inuusuttut kiffaannngissuseqassapput namminneq toqqassallugu suna ilinniarusunnerlugu, taamatummi periarfissaqarpugut. Ataasiakkaanut akeqanngilaq aamma nunap siunissaanut aningaasaliineruvoq.

 

Nalunngilara Avalammi ilaasortat ilinniarnerminni inuutissarsiortunik suleqarnerunissartik kissaatigigaat. Tamanna isumaqarluarpoq inuutissarsiortut nalunngimmassuk sunik pisinnaasallit piginnaanillillu suliffiutiminni pisariaqartinnerlugit. Illuatungeriit tamarmik iluaquserneqassapput. Ilinniartup sullivik misilissavaa, atorsinnaasaminillu misilittagaqarfigilerlugu. Inuutissarsiortunut ajornannginnerulissaaq ujartukkaminnik sulisoqalernissaat. Aamma tamanna aqqutaasinnaavoq amerlanerusut ilinniareernerup kingorna angerlaqqittalernissaannut, suliffissarsisarnissaq ajornaannerulissammata, ataasiakkaat sulliviillu imminnut ilisarisimalereersimappata. Periarfissaqartillugu ilinniartoq suliffeqarfimmiissinnaasassaaq (aasaanerani, jullikkunni, praktikkernerani il.il) aammalu suliassanik annikitsunik peqartillugu misiliitinneqarsinnaapput.

 

Pisariaqarluinnarpoq inuusuttagut siusissukkut misilittagaqartilernissaat. Periarfissanik tunisariaqarpagut. Suliffeqarfimmut aamma iluaqutaalluinnassaaq, sulisussartik siusissukkut malinnaavigilersinnaagamikkut suliassaanillu immersorluarlugu ilinniarnermi nalaani.

Inussiarnersumik inuulluaqqusillunga
Randi Vestergaard Evaldsen
Demokraatit sinnerlugit qinigassanngortittoq

Kontakt Os / Attavigisigut

Vi er ikke tilgængelig lige nu. Men du kan sende os en e-mail, og så vender vi tilbage til dig hurtigst muligt. Massakkut pissarsiarisinnaanngikkutsigut e-mailerpigisinnaavatsigut, uterfigissavatsigit piaarnerpaamik.

Atuarneqarsinnaanngila? Teksti allanngoruk. captcha txt