Del

Demokraatini iluarisimaarparput akissarsiaqqortunerit immikkut akileraartittalernissaannut IA tunuartilermat. IA tunuarternermi peqatigisaanik aperaatigut akileraartarnermut politikki qanoq ittoq siunissami takorloorneripput. Demokraatini isertunngisaannarparput isumaqaratta ooriutitta amerlanersaat sapinngisamik nammineq tigummiinnartassagigut. Tamanna qineqqusaarnerup aallartinneraniit oqaatigereerparput.


Akissarsianit akileraarnissaq pingaaruteqarpoq. Akileraarutit qularnaartarpaat inuiaqatigiit ingerlasinnaanissaat atuarfeqarlutik, napparsimaveqarlutik navianartorsiortunillu ikiuisinnaallutik. Taamaakkaluartorli puigussanngilarput inuiaqatigiit aningaasat akissarsiarinngimmatigit – innuttaasulli akissarsiarimmatigit. Aamma Demokraatini isumaqarpugut inuiaqatigiit isumagisassarigaat innuttaasup sapinngisamik ooriutimi amerlanersaannik tigummiinnartarnissaa. Taamaattumik anguniartuartariaqarparput akileraarutit sapinngisamik minnerpaaffimmiitinnissaat. Taamaasiornikkut ataasiakkaanut ersarississaaq, sulineq tunniussaqarnerlu imminut akilersinnaasut.

Isumaqarpugut naapertuutinngitsoq IA-p siunnersuuteqarneratut akissarsiaqqortunernik immikkut akileraartitsisalernissaq. Sooq inuit sulerusussuseqarluartut annerusumillu tunniussaqarusuttut immikkut akileraartinneqassappat? Unagut isumarput naapertorlugu tamanna naapertuilluartuliornerunngilaq. Kissaatigaarput innuttaasut tamarmik – qanorluunniit isertitaqaraluatunik – nammineq ooriutimik amerlanersaannik tigummiinnartarnissaat.

Sara Olsvigip IA-llu assigiinnginneq eqqartortuarpaat. Oqallinnermut tassunga Demokraatit allamik isumaqarpugut. Isumaqarpugut isiginiarneqarpallaartariaqanngitsoq inuit allanut naleqqiullutik aningaasarsiorluartarnerat. Tamanna pissusissamisuuginnarpoq. Paarlattuanik isumaqarpugut sulissutigineqartariaqartoq akissarsiakinnerpaat ooriutimik amerlanersaannik tigummiinnartalernissaat. Tassani akileraartarnermut politikki sakkuussaaq pingaarutilik. Tassanilu pivagut inuit akileraarutaat taamatullu sulliviit akileraarutaat.

Inuit akileraarutaannut tunngatillugu pingaaruteqarpoq anguniartuassagatsigu sapinngisamik akileraarutip appasinnerpaaffimmiinnissaa. Taamaaliornikkut qularnaasavarput innuttaasut nammineq ooriutimik amerlanersaannik sapinngisamik tigummiinnartarnissaat. Taamaappoq qanorluunniit iseritaqaraluaraanni, qularnaarneqassammat kikkut  tamarmik ooriutimik amerlanersaannut oqaasissaqarnerulernissaat.

Sulliviit akileraartittarnerannut tunngatillugu aamma pingaaruteqarpoq pitsaasumik akileraartarnermut politikkeqarnissaq. Ullumikkut nunatsinni ingerlatseqatigiiffiit akeraarutaat nunanut amerlanerpaanut naleqqiullugu qaffasinneruvoq. Tamatuma sanngiillisarpaatigut. Ingerlatseqatigiiffiit akileraarutaat appartariaqarparput sulliviit nukittorsarumallugit, aningaasaliinissaminnut siuariartornissaminnullu akissaqarneruleqqullugit. Taava suliffissanik pilersitsinerusinnaalissagaluarput, suliffiillu amerlanerulerpata suliffissaaleqisut ikilissapput tamatumalu kinguneranik qularnaassagaluarparput atugarliornerit atugarissaarnerulernissaat.

Inussiarnersumik
Randi Vestergaard Evaldsen
Demokraatit sinnerlugit qinigassanngortittoq

Kontakt Os / Attavigisigut

Vi er ikke tilgængelig lige nu. Men du kan sende os en e-mail, og så vender vi tilbage til dig hurtigst muligt. Massakkut pissarsiarisinnaanngikkutsigut e-mailerpigisinnaavatsigut, uterfigissavatsigit piaarnerpaamik.

Atuarneqarsinnaanngila? Teksti allanngoruk. captcha txt