Del

Imigassamut inatsit nutaaq assersuutissatsialaavoq naalakkersuisoqatigiit saamerliit qanoq iliorlutik kiffaanngissusiiaarusunnerannut. Demokraatini kiffaanngissuseq innuttaasunut utertinniarparput. Imigassamut inatsit nutaaq atorunnaarsinneqassaaq taarserlugulu imigassamut inatsimmik killilersuivallaanngitsumik, ussassaarisoqarsinnaanngorlugu, ammasarfiit sivitsorlugit qularnaarlugulu imigassamik ajornartorsiutillit ataasiakkaat tulluussakkamik katsorsarneqartarnissaat. Inatsit nunatsinnut innuttasunullu tulluussarneqassaaq. Imigassamik ajornartorsiortut ikilisarniarutsigit ajornartorsiutit sorlaqarfii pukuttariaqarpagut, innuttaasullu inersimasutut pillugit.


Nunarsuarmioqataavugut ullullu tamaasa imigassamut pilerisaarutit internettimi tv-milu takujuarlugit. Taamaakkaluartoq naalakkersuisoqatigiit socialistit isumaqarput nunatsinni imigassamut pilerisaarutit inerteqqutiginissaat iluaqutaasoq.

 

Nunatsimmi agguaqatigiisillugu innuttaasut ataasiakkaat imigassaq imertagaat appariartorpoq. Taamaakkaluartoq Siumut, IA aamma Partii Naleraq isumaqarput saagut tunuannut imigassaq toqqorterneqartariaqartoq.Sooruna ajornartorsiutit sorlaqarfii isiginiarneqanngitsut? Pisariaqavissorpoq ajornartorsiutit qaangissagutsigit eqqartorsinnaanissat qallorlugit.

Anngiortumik imigassaarniat imaaginnavipput tassani pinerluttut imiaaqqat karsi 1000 koruunisissutigisinnaasarpaat. Imigassamut inatsimmut akuersisut ammasarfiit killilersornerulernikuuaat tamatumalu kingunissatuaraa anngiortumik nioqquteqartartut pilluakataarnerulernissaat. Tamanna isumaqanngilaq.

Demokraatini imigassamut inatsit nutaaq atorunnaarsinniarparput nunamilu maani inersimasut inersimasutut pillugit.  Saagut piiarniarpagut imigassanillu nioqquteqarneq allatulli nioqquteqarnertut ingerlatilerlugu. Tassa imaappoq, niertarfiit ammanerminni imigassaarniarsinnaassapput. Taamaaliorutta tulleriiaarlutik utaqqisut piissavagut aamma niuerneq allatulli ingerlanneqalissaaq. Taamatut suliniuteqarnitsigut anngiortumik nioqquteqartartut akiorniarpagut taamaasillutalu pinerluttut atugaat ajornerulersillugit.

Imigassap pilerisaarutigineqartarnera inerteqqutaassanngilaq. Arraami ila;  pilerisaarutit takujuarpagut aamma inuusuttunik illersorneqarnissaannik neqitsersorneq isumaqanngilaq. Nunatsinni inuusuttut nunani allaneersuut tv-kanalit takujuarpaat aamma interneti atortuarpaat tassanilu takusinnaajuarlugit imigassamut pilerisaarutit. Taamaattumik innarlerneqarunnanngillat.

Demokraatit kisiartaallutik Inatsisartuni imigassamut inatsit itigartippaat. Suli naaggaarnerput aalajangiusimavarput aamma ilungersuutigissuarput inatsisip atorunnaarsinneqarnissaa. Imigassamut inatsit partiit sinnerisa innuttaasunik upperisaarunnerannut uppernarsaataavoq nutaanerpaaq.  Demokraatini allarluinnarmik isumaqarpugut. Innuttaasut upperaagut. Upperaarput innuttaasut imminnut paarilluarsinnaasut. Akisussaassuseqarluni kiffaanngissuseqarneq upperaarput.
Neriuppugut misigisinnaanngoqqikkumaarlugu inuusuttut cafémi ikinngutiminnik issiaqateqartut unnukkut arfineq-pingasup kingorna. Neriuppugut niuertarfinni inuusuttut imigassamik nioqquteqartut takusinnaanngoqqikkumaarlugit. Aamma imigassaq nioqqutissatulli allatut nioqqutaaleqqikkumaartoq anngiortumik imigassaarniarlutik iluanaarniapiluttartut tammartillugit.

Taamatulli oqareerluta Demokraatini nalunngilarput nunatsinni imigassaq annertuumik ajornartorsiutaasoq. Tamatumalu ajornartorsiutip akiornerani pikkorinnerulertariaqarpugut. Oqareernittuut ajornartorsiutit imerajuttuulertarnermut eqqartortariaqarpagut, ilaatigut pinaveersaartitsinikkut, siusinaartumik iliuuseqarnikkut katsorsaanikkullu aaqqiivigineqarsinnaapput.

Imigassamut assigiinngitsunik katsorsaariaatsinik peqartariaqarpugut, innuttaasut ataasiakkaanut tulluartumik katsorsaasinnaasunik namminneq toqqaasinnaanngorlugit.  Imigassamik ajornartorsiutillit assigiinngitsuupput taamaattumik pingaartorujussuuvoq imigassamik ajornartorsiutillit ataasiakkaat ajornartorsiutaannut aallaaviusup nassaarinissaanut pikkorinnerulernissarput, ataasiakkaanut aamma angusassamik toraagaqarluta katsorsaasalernissaq ingerlattalerniassagatsigu.

Saagunik ajornartorsiutit qaangernavianngilagut, paquminartut eqqartornissaannut sapiinnerulernikuuvugut, tamanna atorluartariaqarparput.

Inussiarnersumik inuulluaqqusillunga
Randi Vestergaard Evaldsen
Demokraatit sinnerlugit qinigassanngortittoq

Kontakt Os / Attavigisigut

Vi er ikke tilgængelig lige nu. Men du kan sende os en e-mail, og så vender vi tilbage til dig hurtigst muligt. Massakkut pissarsiarisinnaanngikkutsigut e-mailerpigisinnaavatsigut, uterfigissavatsigit piaarnerpaamik.

Atuarneqarsinnaanngila? Teksti allanngoruk. captcha txt