Del

Namminersorlutik Oqartussat suliffiutaanni siulersuisunut ilaasortat soorunami toqqarneqartassapput piginnaasaat pisinnaasaallu tunngavigalugit. Tamanna nunamut iluaqutaanerpaassaaq. Allat pissutigalugit toqqaasoqartassappat nuna innarlerneqassaaq.


Demokraatinut pingaaruteqarluinnarpoq ingerlatseqatigiiffiutigut siulersuisoqassammata ingerlatseqatigiiffinnik ingerlatsinissamu eqqortunik piginnaanilinnik pisinnaassusilinnillu pineqarmatami inuiaqatigiit aningaasaataat.

 

Nunarsuarmioqataavugut ulluinnarni unammilleqatigiiffiulluinnartumi. Aamma namminersorlutik oqartussat suliffiutaat unammilleqataasunut ilaapput. Namminersorlutik Oqartussat ingerlatseqatigiiffiini siulersuisut ingerlatseqatigiiffiup takorluugaanik pilersaarutaannillu ilusilersuisussaapput. Tamanna pinngitsoorneqarsinnaanngilaq ingerlatseqatigiiffiit ingerlanneqarsinnaassappata nunamut isumalimmik. Namminersorlutik Oqartussat suliffiuteqarallartillugit Naalakkersuisut suliassaasa pingaarnersaraat suliamik kivitsisinnaasunik inuttalersuissallutik. Uangutsinnut pingaarluinnarpoq siulersuisut tamakkerlutik piginnaaneqarnissaat, ilisimasaqarluarnissaat aamma assigiinngitsunik suliaqartuunissaat.

Ilaasortat nunat allaneersut piginnaanermik misilittakkamillu saniatigut immikkut ilisimasaqarsinnaapput niuerfinnut aalajangersimasunut, tunisassianut aalajangersimasunut imaluunniit attavinnut, namminersorlutik oqartussat ingerlatseqatigiiffiisa iluaqutigisinnaasaannik.

Iluaqutaanngilaq immitsinnut mattulluta ingerlatseqatigiiffinni siulersuisussanik nunaqavissuinnarnik toqqaasalernissarput soorlu Hans Enoksenip siunnersuuteqarneratut. Unammillersinnaassuserput innarlerneqassaaq tamatumalu kinguneranik ingerlatseqatigiiffinni isertinneqartartut appassapput. Tamanna kialluunniit soqutigisarisinnaanngilaa.

Imaanngilarli siulersuisuni nunaqavissut atorsinnaanngikkigut. Nunaqavissut tunniussaqarsinnaapput kulturitsinnut, niuerfitsinnut najukkamilu pissutsinut ilisimasanik annertuunik. Oqimaaqatigiissitsineq eqqort9oq nassaarisassaavoq siulersuisut sapinngisamik nukittunerpaat piginnaaneqarnerpaallu nassaarissangaanni. Tamanna nunatsinnut pitsaanerpaasussaavoq.

Matumani uannut pingaaruteqarpoq erseqqissassallugu nuannaarutigigakku nunatsinni ilinniarsimassutsip qaffakkiartornera. Tamatuma kinguneranik nunaqavissut amerliartortut arriikkaluamik patajaatsumilli piginnaaneqaleriartussapput siulersuisuni sulilersinnaanissaminnut. Tamannalu tunngavigalugu pingaaruteqarpoq tamatsinnut iluaquserumalluta ilinniarsimassusermik ataatsimoorluta qaffassaajuarnissarput.

 

Piffissap ingerlanerani qularnaassavarput amerlingaluttuinnartut ingerlatseqatigiiffiit siulersuisuini ilaasortanngornissaat. Kisianni siunissami inuiaqatigiinni ilinniarsimassuseq qaffangaatsiaraluarpalluunniit suli avataaniik immersorneqarnissarput pisariaqartittuartussaavarput siulersuisunik nukittunerpaamik ivertisassagutta.

 

Uggorisaqaara politikerit tusaqqusaaginnarlutik nuannareqqusaaginnarlutillu imminuinnaq eqqarsaatigileraangata nunarput puigorlugu. Tamatta akisussaaffigaarput nukittunerpaanik inuiaqatigiinnik pilersitsinissarput. Taamaattoqarnavianngilarlu piginnaaneqarluartunik mattussuisassagutta – tamanna aatsaat pinngitsoortissinnaavarput peqataatitsinitsigut aamma tamakkiisumik eqqarsarnitsigut.

 

Hans Enoksenip siunnersuutaa nunaqavissut kisimik namminersorlutik oqartussat suliffeqarfiutaasa siulersuisuini toqqarneqartalernissaannut eqqarsaatigilluangaanngilaq aamma piviusunngortittariaqanngilluinnaqqissaarpoq.

Inussiarnersumik inuulluaqqusillunga
Randi Vestergaard Evaldsen
Demokraatit sinnerlugit qinigassanngortittoq

Kontakt Os / Attavigisigut

Vi er ikke tilgængelig lige nu. Men du kan sende os en e-mail, og så vender vi tilbage til dig hurtigst muligt. Massakkut pissarsiarisinnaanngikkutsigut e-mailerpigisinnaavatsigut, uterfigissavatsigit piaarnerpaamik.

Atuarneqarsinnaanngila? Teksti allanngoruk. captcha txt